അടുക്കളയിലെ അരാഷ്ട്രീയ ബുദ്ധിജീവികള്‍

പഞ്ചായത്ത് ഇലക്ഷന്‍ ചൂട്പിടിക്കുകയാണ്.  തിരഞ്ഞെടുപ്പു മീറ്റിങ്ങില്‍ പങ്കെടുക്കാന്‍ ബീരാനിക്ക കുടയുമെടുത്ത് പുറത്തേക്കിറങ്ങാന്‍ ഒരുങ്ങുമ്പോഴാണ് അടുക്കളയില്‍ നിന്നും ആമിനയുടെ സംസാരം കേട്ടത്. അയല്‍ക്കാരി ജാനുവിനോടാണ്. രണ്ടും പെണ്ണെന്ന ഒരു ജാതിയാണെങ്കിലും  മനുഷ്യരിപ്പോ പല ജാതിയാണല്ലോ . വല്ല വര്‍ഗ്ഗീയ കലാപത്തിനും തുടക്കമിടുകയാണോ. പിഴച്ച കാലമാണല്ലോ. ബീരാനിക്ക ചെവിയോര്‍ത്തു.

ഇത്തയുടെ വോട്ടു ഇത്തവണ ആര്‍ക്കാ - ?

ഞമ്മള്‍  ഇത്തവണ സീ.പി.എമ്മിനാ ജാനൂ. !

നേരോ നിങ്ങള്‍ ലീഗുകാര്‍ സീ.പി.എമ്മിന് വോട്ടു ചെയ്യോ  ഇത്താ - ?

അതൊന്നും ഞമ്മക്ക് അറിയൂലാ. ബീരാനിക്ക ആര്‍ക്കു വോട്ടു ചെയ്യാന്‍ പറഞ്ഞോ    ഓര്ക്കാണ്   ഞമ്മളെ വോട്ടു.  ആമിന തന്‍റെ രാഷ്ട്രീയ നയം വ്യക്തമാക്കി.

നേരാ ഇത്താ... ഞങ്ങടെ വാര്‍ഡില്‍  ഇത്തവണ ബീ.ജെ.പിക്കാര്‍ക്ക് സ്ഥാനാര്‍ഥിയില്ല. ബീ.ജെ.പിക്കാരോടൊക്കെ ലീഗിന് വോട്ടു ചെയ്യാനാ പറഞ്ഞത്. അവിടെ ലീഗിന്റെ സ്ഥാനാര്‍ഥി  ശാരദ ടീച്ചറാ.!

നേരോ ജാനൂ. പഞ്ചായത്ത് ഇലക്ഷന്‍ വരുമ്പോള്‍ എന്തൊക്കെ മറിമായങ്ങളാ നടക്കുന്നെ അല്ലെ.- ? ഈ ആദര്‍ശം എന്നൊക്കെ പറയുന്നത് വെറുതെയാ. അധികാരം കിട്ടുമ്പോ എന്ത് ആദര്‍ശം. ഉദ്ദേശിച്ച വാര്‍ഡില്‍  സ്ഥാനാര്‍ഥിയാക്കാഞ്ഞതിനു ഉടനെ പോയി ബിജെപിയില്‍ ചേര്‍ന്ന കോണ്ഗ്രസ് മെമ്പറെപ്പറ്റി ഇന്നലെ പത്രത്തില്‍ വായിച്ചു. ഇനി ഞമ്മളെ കൂട്ടരേ കാര്യം നോക്കൂ. പത്തമ്പത്   കൊല്ലം രാഷ്ട്രീയം  ഹറാമാണെന്നും  അത് നരകത്തില്‍ പോകാനുള്ള ഏര്‍പ്പാടാണെന്നും പറഞ്ഞു വോട്ടുപോലും ചെയ്യാതെ  ഇലക്ഷന്‍ ദിവസം മൌനവ്രതം   എടുത്തിരുന്ന  ജാമാ-അത്തെ ഇസ്ലാമിക്കാര്  പോലും  മൌദൂദിയെ  മാറ്റിനിര്‍ത്തി   മത്സരിക്കാന്‍ തീരുമാനിച്ചു.  ഇതൊരു ചക്കരക്കുടം തന്നെയാ അല്ലെ ജാനൂ.

തന്നെ തന്നെ. പറയാനുണ്ടോ... പത്രം വായിച്ചാല്‍ ചിരിച്ചു മടുക്കും. ഒരു പഞ്ചായത്തില്‍ കോണ്ഗ്രസ്സും ബീജെപിയും ഒന്നിച്ചാണെങ്കില്‍ തൊട്ടടുത്ത പഞ്ചായത്തില്‍  സീ.പി.എമ്മും ലീഗും, അതിനടുത്ത പഞ്ചായത്തില്‍ ലീഗും ബീജെപ്പിയും, വേറൊരു പഞ്ചായത്തില്‍  സീ.പീ.എമ്മും കോണ്ഗ്രസ്സും,  അങ്ങിനെ തിരിഞ്ഞും മറിഞ്ഞും ഇലക്ഷന്‍വരെ കൂട്ടുകെട്ടു. അത് കഴിഞ്ഞാല്‍ കൂട്ടത്തല്ല്. നമ്മളെ കട്ടുമുടിക്കാന്‍ നമ്മള്‍ വോട്ട് ചെയ്യുന്ന  നമ്മുടെ കള്ളന്മാര്‍ ജയിക്കട്ടെ.

ഇന്റെ റബ്ബേ....ഈ രാഷ്ട്രീയക്കാര്‍ തമ്മില്‍ ഒരു പെണക്കോല്ലാ. പിന്നെ എന്തിനാ  ഇവര് മനുസ്സമ്മാരെ  ഓരോ കാര്യം പറഞ്ഞു തമ്മില്‍ തല്ലിക്കുണതു. ഓരോ പാര്ട്ടിക്കാര് തമ്മില്‍ തല്ലി എത്ര പേരെ ജീവന്‍ പോയിരിക്കുണു   ഞമ്മളെ ഈ കേരളക്കരേല്‍    ജാനൂ..!

അതല്ലേ പറയിണത്  ഇത്താ.... ഇവിടെ കാര്യത്തോട് അടുക്കൊമ്പോ നേതാക്കന്മാര്‍ തമ്മില്‍ ഒരു പ്രശ്നവും ഇല്ല. പക്ഷെ അവര് വെട്ടാന്‍ പറയുമ്പോ വെട്ടാനും കൊല്ലാന്‍ പറയുമ്പോ കൊല്ലാനും നടക്കുന്ന അനുയായികളുണ്ടല്ലോ..അവരാണ്  വിവരം കെട്ടവര്‍.

ശരിയാ ഞമ്മള്  കേട്ടുക്കുണു ബീരാനിക്ക പറിണതു  പൊതുജനം കഴുതയാന്നു.

അടുക്കളയിലെ സ്ത്രീ ബുദ്ധി ജീവികളുടെ  ഈ അന്താരാഷ്‌ട്ര ചര്‍ച്ച ബീരാനിക്കയെ ഒന്നു ഇരുത്തി ചിന്തിപ്പിച്ചു. പിന്നെ കുട മടക്കി ഇറയത്തു  തൂക്കിയിട്ടു   ഒരു കൈലി മുണ്ടും ഉടുത്തു പറമ്പിലേക്ക് നടന്നു. മഴ വരുന്നുണ്ട്.  അതിനുമുമ്പ് നാലു തെങ്ങിന് വളം ഇടണം. 

.